منتديات الأمير والنسر


منتدى كنيسة مارجرجس والانبا باخوميوس بالاسكندرية
 
الرئيسيةس .و .جالتسجيلدخول

شاطر | 
 

 قصيدة (مش هتموت) لبشرى عجبان

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
George Zeefa
مدير عام


عدد الرسائل : 114
العمر : 27
اسم شفيعك ايه؟ : St. George and Angel Michael
نقاط : 18
تاريخ التسجيل : 30/10/2008

مُساهمةموضوع: قصيدة (مش هتموت) لبشرى عجبان   الإثنين نوفمبر 03, 2008 7:02 pm

المشهد الأول (حياه وحيّة)
**********************

القصة تبدأ بآدم وحوا
وحياة وحيّة .. وإله وشهوة
عند كان بقى ولا سهوة
وقعوا في بحر مالهش نهاية
عانوا وعاموا لحد البر
بر جزيرة حدودها الشر
داقوا الموت والويل والمر
والأجيال تحكيها حكاية
جوه الأرض .. حر وبرد
جهد .. وصُخرة ومطرة ورعد
بس عاشو على طيف وعد
إن بعد البُعد بداية
وإن البحر في يوم حيقوم
والإنسان حيثور ويعوم
ويسيب شط جزيرة اللوم
ويرجع أصل وصورة وآية ..
يرجع أصل وصورة وآية.

***********************
المشهد التاني (مطلعش خيال)
***********************

على شط جزيرة الدنيا الغريبة
بعد ما كنا أتحبسنا فيها
وقفت مركب نجاه عجيبة
علشان نركب.. نهرب بيها !!
مش زي مراكب الحكايات
فيها شوية إختلافات !!
مفيهاش شراع مفيهاش دراع
ولا فيها صاري ولا طوق نجاه
ولا ملاحين ولا بحارين
ولا حتى دفّه وإتجاه
مركب .. يا حلم !!
يا خيال .. يا علم !!
وناس كتير حابه الجزيرة
وناس كتير في قلق وحيرة !!
بين الأمل والحق ..
بين القبول والـ "لأ"
بين شك كان مغمور
وإيمان خرج للنور:
دققت بعيني لمحت خيال
على ضهر المركب مد إيديه
على كتفه الموج يرسم أحمال
نقشته من راسه ومن رجليه
ومكان مجاديف الحب أثار
طبعت في إيديه حفرة مسمار
دققت كمان مطلعش خيال
على ضهر المركب مد إيديه
على كتفه الموج يرسم أحمال
نقشته من راسه ومن رجليه
وشاورلي بأيده عشان أركب
وجريت بالعكس عشان أهرب
مرعوب م الموج .. وعلامة الشوك
مرسومة بلون البرق عليه
والسما بركان .. والرعد جبال
وهدير مسحور بينادي عليه
وأنا بجري وبجري عشان أهرب
وغريبة لقيت نفسي بقرّب
قلتله طب ليه ؟
هتموت عشان إيه ؟
ده الموج عالي والبحر غريق
وجزيرة الناس صرخت بحماس
أغرق . أغرق . ومالكش صديق !!
بصلهم وأنا فاكر عينه
وإتلفت للبحر وضمه
وإتعاركو حبه وأنينه
وغرق على صرخة من ألمه
والبحر رجع ساكن عادي
وكأنه بريء والموج هادي
ورماني وحيد على شط الموت
وجزيرة الناس أشبح وسكوت
دققت بعيني ماكنش فيه حد
والمركب فاضية مفيهاش يد
وكان السبت وجاي الحد
ويا ترى هيجبلنا إيه المد ؟!

**************************
المشهد التالت (جزيرة الناس)
**************************

وجزيرة الناس كلها حكايات
كلها روايات كلها أسرار
كلها أشجان .. كلها أحزان
وغلابه كتير .. وكتير أشرار
وبقايا حاجات شبه إحتفالات
فرشولها الأرض فروع أشجار
وصدى الهتافات أولاد وبنات
بيقابلو ملك بغنى وأشعار!!
مفهمتش مين ؟! ولقيت مسكين
على أرض الخوف..
مشتاء ملهوف
كان نفسه يشوف
من فوق السور
مجروح مكسور
إنه ماقبلوش
قالي ماشوفتوش؟!
قصده على مين ؟
ملك الشعانين !!
قلتله معرفش
بس مصدقش ..
قالي متقدرش
تصاحبني معاك على شط الموت ؟!
وبدأنا نفوت
بين الحكايات
نسمع ألغاز وعجب وآيات
مدبوح .. وضعيف
مجروح .. وكفيف
بيقولو شفانا وبعدها مات
طب كان شبه إيه ؟
وصفولي عنيه !!
وبدأت أجمّع أوصافهم
وأتلمو كتير على دين الخير
وأتفقوا بأنه اللي عرفهم
أوجاع وعيوب .. أفكار وقلوب
يجمعها مس عجيب مسحور
والوصف قريب .. لغريق وغريب
الظاهر إنه ملك مشهور !!
وقابلت كمان جن وأنسان
مفزوع مرعوب مش راضي يتوب
يائس مخنوق .. ميت مشنوق
وأتنين حراس ماسكين في التوب !!
وبنات باكيات
وملكة أحزان
بتشع حنان بتقول أشجان
" يا دنيا قومي وشوفي
النار اللي في جوفي
أنا حبكي من خوفي
وأنتي أفرحي بالأمان.."
وعبيد خايفين شبه التعابين
لابسين كهنوت ماسكين فرمان
وعيون أتباع ناسين تايهين
ودموع ندمان تمن النكران
وقابلت بديل كان حقه قتيل
فكوه وسابوه بدل الغرقان !!
أوجاع وعيوب .. أفكار وقلوب
يجمعها مس عجيب مسحور
والوصف قريب .. لغريق وغريب
الظاهر إنه ملك مشهور !!

**********************
المشهد الرابع (نَفَس الحوت)
**********************

لما شاورلي مركبتش ليه ؟
أنا زي الكل حكمت عليه
خدت المسكين وأحنا الأتنين
روحناع الشط عشان نلاقيه
وكمان ملايين .. حاسين بالدين
بيراقبو البحر اللي غرق فيه
وخيال منسوج ركبني الموج
يشبه للموج اللي غدر بيه
وناديت يا يســوع ..
أحنا المساكين
ظهروا الشياطين
وسط المساجين
موسى ويشــوع
آدم صموئيل
هوشع وهارون
وقايين وهابيل
أستير وراعوث
يعقوب وداود
مساجين والموج
على شكل قيود
وجزيرة الناس
كلها أدناس
محتاجة خلاص
محتاجة رجوع
وناديت يا يســوع ..
أحنا المساكين
ماحناش أموات
ماحناش عايشين !!
مسمعتش صوت
غير نفّس الحوت
ورجعت وحيد
على شط بعيد
وجزيرة الناس
أشباح وعبيد
دققت بعيني ماكنش فيه حد
والمركب فاضية مفيهاش يد
وكان السبت وجاي الحد
ويا ترى هيجبلنا إيه المد ؟!

***************************
المشهد الخامس (عيون غربان)
***************************

بايت حيران على شط الموت
والليل غضبان .. خجلان مكبوت
ملعون البحر .. ملعون الموت
أزاي يبلع ملك الملكوت
ده كتير رباه .. حكمه وهداه
وكتير لمحوه .. بيخطي فوقيه
وغريق نجاه .. وضعيف قواه
وكتير أموات قامو على إيديه
بايت حيران على شط الويل
والليل غضبان خجلان قلقان
وعيون غربان على شكل شيطان
بيراقب الموج مفزوع وجبان
وطيور بتحوم على شكل نجوم
تنشر في سلام وهدوء وأمان
ولمحت هناك .. جناحات لملاك
بجناح لهلاك وجناح فرحان
وطبق ع الليل بجناح وجناح
والليل طاوعه علشان ينزاح
بايت حيران على شط الخوف
والليل غضبان خجلان مكسوف
من فجر أكيد .. جاي وملهوف
ومعاه مواعيد .. ونهار مكشوف
بايت حيران على شط الموت
والليل غضبان .. خجلان مكبوت
ملعون البحر .. ملعون الموت
أزاي يبلع ملك الملكوت

***************************
المشهد السادس (نظرة)
***************************

أنا شفت خيال مطلعش خيال
على ضهر المركب مد إيديه
ميت غرقان راح فدى أجيال
وخطية شعب بحالها عليه
شعب ميفهمش .. بيموت ما يقومش
يترمى في البحر ومين يفديه
والبحر يزيد مساجين وعبيد
صاحين نايمين أمواج بدموع
وينادو يا يــســوع
أحنا المساكين
ماحناش أموات .. ماحناش عايشين
ردوا الشياطين
أهو جالكو يسوع ..
ميت زيكوا ومعاه لصين
بصوا الأموات ..
ليسوع في سكات
كان فك قيودهم حررهم
واشترى بالدم ولاده ومات
على يد البحر اللي أسرهم
وأنطلقوا لفوق ..
جواهم شوق
هنعيش وياك في الملكوت
وأتلفت شافني وأنا بغرق
علشان راجع لجزيرة الموت
ووعدني بنظرة وأنا مصدق
مستني البحر وسامع صوت
بيقول أنا مت عشان خاطرك
يبقى أنت هتحيا مش هتمـــوت..
مش هتمـــوت .
الرجوع الى أعلى الصفحة اذهب الى الأسفل
christian boy
مدير عام


عدد الرسائل : 349
العمر : 26
نقاط : 138
تاريخ التسجيل : 30/10/2008

مُساهمةموضوع: رد: قصيدة (مش هتموت) لبشرى عجبان   الإثنين نوفمبر 03, 2008 7:38 pm

طبعا انا كنت حاضر اثناء القائها
وهي بجد قصيدة تحفة
الرجوع الى أعلى الصفحة اذهب الى الأسفل
Diana
مدير عام


عدد الرسائل : 1000
العمر : 26
اسم شفيعك ايه؟ : الملاك ميخائيل والبابا كيرلس
نقاط : 662
تاريخ التسجيل : 27/12/2008

مُساهمةموضوع: رد: قصيدة (مش هتموت) لبشرى عجبان   الأحد ديسمبر 28, 2008 6:15 pm

بجد جميلة جدااااااااااااااااااااااااااااااااااااااااااااا
فظيييييييييييييييييييييييييييييييييييييعة

_________________

الرجوع الى أعلى الصفحة اذهب الى الأسفل
 
قصيدة (مش هتموت) لبشرى عجبان
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات الأمير والنسر :: القسم الثقافي والفني والعلمي :: اشعار وخواطر-
انتقل الى: